الكورتيزون

دكتور هانى الناظر

بفكر حضراتكم بموضوع مهم بحكم تخصصي كطبيب امراض جلدية …الموضوع ده خاص بالدهانات اللي بنستعملها وبتحتوي علي الكورتيزون سواء كانت كريمات او مراهم او محاليل .. لازم نعرف ان الدهانات دي أدوية مهمة وأساسية ولها استعمالات محددة ومنقدرش نستغني عنها بس مينفعش برضه ان احنا نستعملها بطريقة عشوائية لعلاج اي مشكلة او التهاب في الجلد او نوصفها لبعض فعلي سبيل المثال هي علاج اساسي للاكزيما بأشكالها المختلفة والصدفية واحيانا للبهاق والثعلبة والعديد من الأمراض الاخري سواء للكبار اوالصغار لكن الذي يصفها لابد ان يكون طبيب متخصص .. ليه بقول كدة ؟ لان الاستخدام العشوائي والخاطئ لها والمتكرر بيعمل اثار ضارة فاذا استعملناها بكثرة علي جلد الخدين والذقن ممكن تتسبب في ظهور شعر غير عادي في الوجه او تكون شعيرات دموية تحت الجلد سهلة النزف وساعات تخلي الجلد رقيق جداً ..كمان مينفعش ندهن مناطق الثنايا او الجانبين او الفخذين لفترات طويلة لانها ممكن تعمل ضمور في الجلد ويظهر في صورة خطوط حمراء عميقة صعب علاجها وعاوز اقول كمان ان دهان مساحات كبيرة من الجسم بالدهانات دي بيؤدئ لامتصاص الكورتيزون للداخل ويكون له تأثير ضار علي مرضي الضغط والسكر وغيرهم .. ولكن لازم نعرف برضه ان الدهانات دي موش كلها زي بعض يعني في انواع مختلفة منها بيكون تأثيرها أقوي من الأنواع التانية وبعضها بيكون اخف يعني في دهانات بيكون تركيز الكورتيزون فيها عالي او من النوع سهل الامتصاص ودي بتكون أقوي وفي انواع بتكون نسبة الكورتيزون قليلة وتاثيرها بيكون اخف وضررها اقل ..المهم في النهاية عاوز اقول ان الدهانات دي مهمة وضرورية ومنقدرش نستغني عنها في علاج العديد من الأمراض الجلدية ولكن لابد ان يصفها الطبيب علشان تحقق الفائدة المرجوة منها في العلاج وتعطي احسن نتائج بدون اي اثار جانبية تماما .. وارجوكم لا تستعملوها بأنفسكم بطريقة عشوائية ومتكررة ولا تصفوها للغير