حكايات وأسرار البنات والستات .. حكاية ريكا

غادة حنفى

نفسي افرح وعيني تلمع من كتر الفرحه حاولت كتير أوصل للشعور ده لكن للأسف مش عارفه لاغايه لما قررت اني أحاول بنفسي اجيب السعاده عندي؟؟..
حكايتي بدات من ساعه ما سكنت اودامنا عروسه اسمها هدي جوزها وسيم ابتسامته تجنن اول ماشوفته صراحه قولت خساره فيها هي دمها تقيل اوي.حتي اختي كان رأيها زي ..
فاتن:شوفتي رامي جوز هدي عسل اوي قابل بابا علي السلم وهو طالع شايل شنط صمم يشيل منه الشنط
ريكا:اه محترم فعلا ..عارفه سمعته كان بيدلع فيها ويتحايل عليها يعزمها علي العشا وهي تقوله لا خالينا في البيت احسن
فاتن:كئيبه.. بس تعالي هنا انتي بتسمعيهم ازاي يابت
ريكا:هقولك شباك المطبخ اللي في المنور قصاد شباك اوضه النوم بتاعتهم مره كنت بعمل قهوه لبابا وسمعتهم من ساعتها عرفت ان لو وقفت في المطبخ أسمعهم
فاتن:بس خالي بالك لو ماما شافتك هيبقي يومك اسود
ريكا:لا ماتخافيش هي امك مش مركزه مع حد في البيت غير مع أخوكي وابوكي
فاتن:معاكي حق بس هو احنا هنفضل كده من ساعه ما اتخرَّجنا مش لاقين شغل وقاعدين في البيت ..حتي مافيش عريس راضي يجي ناحيتنا الواحده خلاص زهقت
ريكا:تصدقي انا كمان مخنوقه فاكره ثناء اللي كانت معايا في الجامعه
فاتن:اه الحوله دي ،،،مالها
ريكا:عارفه الحوله دي أتخطبت وهتتجوز الشهر الجاي وعرسها بقي ماقولكيش جايب لها شبكه غاليه وعنده شقه تمليك ،

فاتن:يا سلام وهيتجوزها علي ايه دي وحشه اوي دي غبي ده ولا ايه؟؟!!!
ريكا:يارب تولع قبل ما تتجوزه..
نفسي أعيش لحظات حلوه احب واتحب خصوصا من ساعه ما بقيت كل يوم اشوف رامي بيدلع هدي …مافيش ولا يوم يعدي الا لما يكون عامل ليها مفاجاه حلوه حتي مره كانت زعلانه فضل يصالح فيها طول الليل مش عارفه علي ايه ..فكرت ان اخد مكانها اللي أصلا خساره فيها بس ازاي بقيت أحاول ألفت نظره ادخل عندها واتصاحب عليها وطول ما هو موجود ادخل عندهم ..بس بصراحه هو كان خجول يدخل أوضته ومايقعديش معنا أتغاظت اكتر انه محترم وعينه مش زايغه..
فكرت ان أوقع بينهم.. قولتلها اني سمعت رامي وهو بيكلم واحده ولازم تخالي بالها بصراحه الغيره كانت هتموتها عرفت من هنا ان نقطه ضعفها الغيره ..ومش واثقه من نفسها..وبتبقي نكديه اوي لما بتغير…دخلت الفيس وعملت إيميل باسم وهمي وبقيت ابعت له رسايل علي الفيس هو الاول أفتكر ان واحد صاحبه عامل فيه مقلب ..هي طبعا فهمت انه بيعرف واحده خصوصا لما انا خالتها تتجسس علي الرسايل بتاعته.. في الفتره دي هدي كانت كل يوم تعمل مشكله معاه كان الاول بيصالحها وماما ساعات كانت بتتدخل تصلح بينهم وكنت بتغاظ منها اوي ..اقتربت منه من خلال مشاكلهم اللي بقت مستمره ..بقيت أتكلم معاه في التليفون كتير اد ايه انسان رقيق وطيب حابيته بجد واتمنيت انه يكون ليا..ساعتها قررت ان وانا عندها اجيب منديل ورق عادي مكانه روج وأحاطه في جيبه فعلا دخلت عندها وهي في المطبخ لاقيت البنطلون بتاعه متعلق في الاوضه دخلت بسرعه حاطيت المنديل من غير ما تشوفني ..طبعا راحت جابت اهله وأهلها وعملت مشكله كبيره..ولأول مره تغلط فيه اودام اهله هو طبعا كرامته وجعته فطلقها كان اسعد يوم في حياتي فضلت أرقص طول الليل
فاتن:انتي هبله هو بيحبها وهيرجعوا لبعض
ريكا:لا خلاص وهتشوفي
فاتن:المهم سيبك من الهبل ده أبوكي جايب لك عريس ابن واحد صاحبه
ريكا:لا طبعا مش عاوزه اتجوز
فاتن:يا سلام ده احنا ما صدقنا
ريكا:يا ستي خديه انتي
فاتن:ياريت بس انتي الأكبر وبابا قال يشوفك انتي..
ريكا:انا مش هتجوز جواز صالونات اتجوزي انتي
أقنعت بابا وماما بالعافيه ان العريس يشوف فاتن وسبحان الله اول ما شافها وافق وهيتجوزها وتسافر معها السعودية مكان شغله فرحت اوي كل ده وانا كنت لِسَّه بكلم رامي اللي كان قلبه موجوع لانه لِسَّه بيحب هدي بس صعبان عليه منها دايما يقولي انه بيحبها لو كلمته ممكن يتصالحوا انا عرفت كده بقيت أكلمها وأعرفها انه بيجيب واحده البيت هي نار الغيره ولعت فيها راحت جابت اَهلها ولمت عفش البيت كله افتكرت انه بيجيب واحده علي عفشها..طبعا حصلت مشاكل كتير بينهم ..ساعتها بطل رامي يكلمني وقعد عند اهله وغير رقم تليفونه بقيت أكلمه علي الفيس مش عاوز يرد عليا انا عارفه انه ما كانيش بيحبني..لكن انا اللي هخاليه يحبني..قررت ان اروح له عند شغله اشوفه لاقيته ساب الشغل وعرفت انه هيسافر بره مصر..فضلت واقفه في الشارع اودام بيتهم لاغايه لما شوفته نازل اول ما شافني استغرب
رامي:في حاجه حصلت في الشقه
ريكا:لا بصراحه انا جايه أقابلك انت
رامي:خير

ريكا:اصل عرفت انك هتسافر وتسيب البلد ليه
رامي:ظروف ،قولت أغير حياتي وابدء من جديد من مكان تاني
ريكا: انا ممكن اسافر معاك ونبدء سوا ..رامي انا بحبك
رامي:بس انا بعتبرك زي اختي..ايه اللي انتي بتقوليه ده
ريكا:لا انت بتحبني انا حاسه بيك
رامي:إحساسك غلط انا عمري ما حابيت غير هدي
ريكا:علي فكره هدي هتتجوز ابن خالتها ،،
رامي:علشان كده انا هسافر واسيب البلد مش هقدر أشوفها مع حد تاني
ريكا:دي غبيه وعمرها ما حابيتك
رامي:جايز بس انا ما حابيتيش غيرها ومش هعرف احب واحده تانيه
سابني ومشي كنت هتجنن يعني ازاي بعد كل اللي عملته ده وفي الاخر برده ما اوصليش للسعادة والحب اللي كنت بدور عليهم…