حكايات وأسرار البنات والستات .. حكاية سوما

غادة حنفى
ساعات بنحب نخرج بره قالب حياتنا والروتين اللي بنعيشه بس المره دي حاسه اني خرجت بره الدنيا أصلا!!!!!
انا سوما متجوزه من صلاح موظف في هيئه المرافق وعندي ولد وبنت كارما ومحمد الحمدالله عايشه مبسوطه اوي مع جوزي وولادي لاغايه لما جوزي قرر نعيش في شقه حماتي المقفوله بقالها سنين علشان ناجر شقتنا بصراحه انا وافقت علي طول خصوصا ان ظروف الحياه بقت صعبه اوي بعد ما بنتي كارما دخلت ثانوية عامه علمي علوم وابني في الإعدادية وبعدين شقه حماتي مع انها في بيت قديم لكن صراحه كبيره وحلوه،بيت حماتي في منطقه هاديه قولت فرصه علشان أولادي يركزوا في المذاكره ..
صلاح:الحمدالله الشقه هنا أوسع يعني كل عيل في اوضه وكمان في اوضه صالون بدل ما كان محمد ليه سرير في اوضه الصالون وكنتي بتبقي مكسوفه لما حد يجي يزورنا..
سوما:اه وكمان الصالون تصدق لِسَّه ماسك نفسه الحمدالله بس ايه ده البيت بقي فاضي من السكان حتي البيت اللي جانبه ليه كده
صلاح:علشان كل واحد اتجوز ومشي من المنطقه واللي عنده شقه قفلها وزي ما انتي شايفه المنطقه برده محدوفه شويه..
كارما:بس في البيت اللي جنبنا ناس ساكنه
سوما:تقريبا انا لمحت من شباك المطبخ ست كبيره كانت واقفه بتبص عليا بسلم عليها ما رديتش… تقريبا ما خدتيش بالها مني

محمد:لا يا ماما انا شوفت بنت شابه زي اختي كده
كارما:انا فعلا شوفت بنت زي من البلكونه بتاعت الصاله كانت واقفه وحتي ضحكتلي
صلاح:ما البلكونه بتاعتهم لازقه في البلكونه بتاعتنا
سوما:هي مين طيب اللي كانت ساكنه جنب مامتك
صلاح:والله انا فاكر ان الشقه كانت بتاعت ست طيبه بس لما امي ماتت هي كمان بيقولوا ماتت في نفس السنه وعيالها باعوا الشقه بس مش عارف باعوها لمين
سوما:بكره نعرف..
من اول يوم كنّا بنسمع الست بتتخانق مع بنتها او حفيدتها قولت أشوفهم أتكلم معاهم احنا جيران برده بس كل لما اروح البيت عندهم الاقي الباب الحديد مقفول من تحت
قولت يمكن بيشتغلوا بس الغريب الباب بيقي مقفول ليل نهار سالت البقال اللي علي ناصيه الشارع قالي مافيش حد ساكن في البيت أصلا،طبعا قولت اكيد البقال مش عارف سكان الشارع كلهم …
كارما:ماما ده انا كنت هصاحيكي انتي وبابا امبارح بالليل البنت اللي ساكنه جنبنا كانت بتعيط وتضحك اخر جنان مش عارفه اذاكر بقولك ايه انا هنام في اوضه تانيه بعيد عن الاوضه دي لانها جنب أوضتها تقريبا
سوما:معقوله خلاص يابنتي ناني في اوضه تانيه
انا بقيت احس ان في حاجه غريبه بتحصل خصوصا ان ابني محمد بقي كل شويه تعبان من ساعه ما جينا الشقه مش عاوزه أكون بخرف بس بعد اللي شوفته اتاكدت طلعت السطوح لأول مره من يوم ما سكنت لاقيت ان في باب مشترك بين البيتين الفضول خالاني عاوزه اعرف الست دي هي والبنت اللي معها فيهم ايه فعلا فتحت الباب هو قديم أصلا ومكسر الغريب اني وانا نازله جوه البيت كله زباله زي ما يكون مهجور.. قولت يمكن الست مش بتحب تنضف السلم وانا نازله ببص علي الشقق مقفولة نزلت الشقه اللي المفروض ساكنه فيها الاقي الباب كله عنكبوت وعليه تراب برن الجرس تقريبا الكهربا قاطعه …بخبط علي الباب
سوما:يا حاجه…. اللي هنا ،،،
لاقيت قط اسود فضل يذوم عليا خوفت بقوله بس بس ،سمعت القط بيقولي لا ساعتها صرخت وطلعت اجري تاني علي السطوح ونزلت شقتي لاقيت صلاح اترميت في حضنه وفضلت اعيط
صلاح:طب اهدي مش عارف افهم حاجه
سوما:انا دخلت البيت بقولك ومالاقتيش حد فعلا والقط رد عليا
فضل يضحك وهو والعيال
صلاح:تعالي وريني القط قليل الأدب ده اللي بيرد عليكي وانا ادبحه
كارما:معقوله يا ماما انتي بس اتهيئلك مش اكتر
سوما:والله العظيم ابدا ،لو مش مصدق روح شوف بنفسك
صلاح:انا فعلا هروح وتعالي معايا يلا
محمد:استني يا بابا انا جي معاكم
سوما:انت يا ابني عيان خاليك مع اختك
لكن فعلا طلعت انا وصلاح والعيال ودخلنا البيت مالقيناش أي حاجه ومحمد لاقي برواز في صوره لولد معاه كلب مرميه علي السلم اودام باب شقه من الشقق المقفوله وهو بيحب الكلاب اوي خد الصوره
صلاح:مايصحيش كده حاجه مش بتاعتنا سيبها مكانها
محمد:يابابا دي رمينها وشكل الكلب حلو اوي في الصوره

كارما:هي فين الست وبنتها البيت شكله مافيهوش حد
صلاح:ممكن يكونوا مشيوا
رجعت انا وصلاح شقتنا والعيال وأحنا نايمين سمعنا صوت صراخ جامد ونور مولع في الشقه بصينا من البلكونه صلاح شاف الست الكبيره وانا كمان لابسه طرحه بيضا وبتصرخ والبنت واقفه قصدها بتضحك الموقف مستفز
سوما:انا هطلع للبنت قليله الأدب دي تلاقي دي جدتها وهي قاعدها معاه بس دي شكلها بتعذبها في حاجه غلط
صلاح:مالناش دعوه
سوما:لا مايصحيش انا مش هسكت
فجاه سمعنا محمد بيصرخ دخلنا عليه لاقيناه خايف وبيشاور علي البرواز و جسمه سخن وبيرتعش
محمد:بابا الكلب كان بيبص عليا لما قربت من الصوره لاقيت الولد بيامر الكلب يهجم عليا وعينه كلها غضب فضلت اصرخ انا خايف منه
بنبص عليها لاقيتها مافيهاش حاجه بس صلاح خد الصوره رأمها،وانا اخدت ابني في حضني ونام لكن سمعت صوت حد بيخبط قومت اشوف مين بفتح الباب مالاقتيش حد خرجت ابص من البلكونه لاقيت البنت بتضرب الست الكبيره والست بتعيط
سوما:عيب كده يا بنتي مايصحيش اللي انتي بتعمليه ده..
فجاه لاقيت اللي بيخبط علي ضهري ببص ورايا لاقيت الست الكبيره وشها شبه اللي عندهم مرض طاعون عينها بيضا عجوزه جدا سنانها مكسره..بتخبطني جامد في قلبي..بايدها اللي كلها طين وسخنه
الست الكبيره:وانتي مالك ومالنا خاليكي في حالك احسن لك؟؟؟!!!!
حاطيت ايدي علي قلبي من وجع الخبطه.. مش قادره اصرخ او انطق لاقيت البنت واقفه ورآها بتضحك بخبث،حاسيت الدنيا بتلف بيا لاقيت نفسي علي السرير والعيال حواليا وصلاح ماسك ايدي…
سوما:ايه في ايه ؟؟؟
صلاح:انتي اللي في ايه بقالك يومين في غيبوبه واحنا معاكي هنا في المستشفى
افتكرت اللي حصل فضلت اعيط وأحكي له…
صلاح:انا مصدقك انا عرفت مين اللي كان ساكن في البيت وحصل في ايه الحمدالله ان احنا خرجنا سالمين انتي مش عارفه اللي كانوا ساكنين في البيت حصل معاهم ايه،،