رئيس مجلس التحرير

خالد فؤاد

رئيس التحرير

عمرو فارس

إشراف عام

أحمد شلبي ونرمين حمزة

عينه بتحدف شمال


71
الجمعة 18 يونيو 2021, 3:07 م


كتبت : رانيا كمال العربى

قريت في كتاب ان ممكن تعرف شخصية اللي قدامك من حركاته و نظراته!!
مثلا لما بؤبؤ العين يوسع يبقي الشخص مبسوط وهو بيتكلم معاك !!
ولو بيبص ناحية الشمال يبقي صادق وبيقول الحقيقة..يعني اول ماتلاقوا الشخص اللي قدامكم عينه بتحدف شمال تعرفوا انه كويس!!
لكن بقي لو عينه بتحدف يمين يبقي بيألف وعامل فيلم عليك وبيخترع في حواديت!!
ولما تلاقي اللي قدامك عمال يهز في دماغه زي يونس شلبي في العيال كبرت يبقي اتاكد انه مش فاهم منك ولا كلمة وبيريحك وخلاص!!
ولو لقيته عمال يرجع لورا اعرف انه بيكذب عليك!!
ولما تشوفه بيهرش في ودنه ومناخيره ودقنه يبقي تتاكد انه محتاج يروح يستحمي!!
وبعدين ما قريت المقالة دي نويت اطبقها عملي وروحت اشتري فاكهة من الفاكهاني
و بسال البائع: بكام كيلو الموز؟
البائع: ب عشرة جنيه
(وقعد يرجع لورا شكله بيكدب!)
_ طيب كيلو الجوافة بكام؟
_ قعد يهرش في دماغه
(ماخدنهاش دي بس يمكن فيه حشرات في راسه ملهاش علاقة دي باشارات الجسم)
_ طيب بكام كيلو المانجة؟ وخد بالك عشان انا مركزة اوي معاك
_ ب ٧٠جنيه
_ اييييه سبعين جنيه الكيلو؟
( وعينه عماله تحدف شمال)
_ ايه ده انت عينك بتحدف شمال يبقي انت كويس و محترم وبتقول الحقيقه
_ البائع: الله يسترك يا أبلة
_ طيب اوزن لي ٣ مانجات ينوبك ثواب عشان معييش غير تلاتين جنيه ونفسي في المانجة
_البائع: طب حضرتك بترجعي ورا ليه؟
_عشان بكدب يابني الكدب خيبة
ناولني كيلو موز وخلاص
وفجأة لقيت واحدة جاية وبتزعق في الفكهاني
_ ياحرامي ياغشاش مديني موز و عنب معطبين وبايظين يا ضلالي
_ لا حضرتك ده شخص محترم اوي بامارة عينه بتحدف شمال (انا بدافع عنه)
_ ايوة ده راجل شمال وانا هربيه
_ لا حضرتك ده غلبان ( انا برضه لسه بدافع )!!
_ تبقي نصابة زيه ياالدلعدي ولازم اعلمكم الادب انتوا الجوز !!
و لقيت الست هجمت عليا هجمة مرتدة ثلاثية الابعاد تقولوش هرقليز رجع من جديد !! و قامت رامية قفص الفاكهة في وشي وناطة زي محمد صلاح لما بينط عشان يدخل جون وقامت مدخلة جون في وشي !! والشارع كله هيييه هيييه جون جون !! بس تقريبا كده الضربة اثرت عليا لان من ساعة مافوقت وانا عيني بتحدف شمال !!


كواليس هي مجلة فنية رياضية تصدر عن مؤسسة كواليس. تأسست المجلة سنة 2019