نصائح للاستمتاع بالشاطىء

دكتور هانى الناظر

النشرة الجوية بتقول ان النهاردة الجو رائع علي كل شواطئ مصر وحضرتك قررت تقضي يوم اجازة حلو علي البحر .. طيب تعمل ايه علشان تستمتع بيوم هادئ من غير ما حاجة تعكنن عليك ؟ اقول لحضرتك تعمل ايه ..اولا وانت نازل من البيت رايح الشاطئ تلبس ملابس قطن بيضاء وكاب او برنيطة علي راسك ونظارة غامقة علشان تحمي نفسك من الشمس ثانيا خللي معاك زجاجة مياه تشرب منها كل شوية وطول النهار ثالثا وانت قاعد تحت الشمسية احرص كل شوية علي حك قدمك في الرمال علشان تتخلص من الجلد الميت والفطريات الموجودة بين أصابع القدم رابعا لو عاوز تستمتع بأشعة الشمس البنفسجية وتحصل علي فيتامين د اقعد في الشمس بعد الساعة اربعة العصر علشان ما تتعرضش لحروق الشمس وفي نفس الوقت تستفيد خامسا لو حضرتك آنسة او سيدة وخايفة علي شعرك من ملوحة البحر ممكن ندهن الشعر بزيت اللوز الحلو قبل النزول للمياه وبفكر حضرتك بلاش الماكياچ وانتي ماشية او قاعدة في الشمس علشان مايتركش بقع سمراء علي الجلد سادسا واخيرا واحنا راجعين من علي البحر بلاش السير والقدم حافية خوفا من شوكة في الارض او حاجة مكسورة تجرح القدم وتعمل لنا مشاكل …اجازة سعيدة ويوم جميل باذن الله لكم جميعا