كلمات الشاعر /محمد صبحي
لما برجع للرسايل
إللي جاتلك من سنين
بلقى كحل الحبر سايل
راسم الشوق والحنين
كل حرف بدمعة تجرى
يروى بسمة لما أشوفك
يطلع الفجر الحنين
بين كفوفك
يعلي صوتك
تغفى عينى بين شفايفك
تحضنك تعلن سكوتك
رغم صمتك فيا دوشه
كورَّس الأحزان بيعزف
لحن كان نفسه يشوفك
قلت أمسك قلمى وأعزف
رحت عازف 100 قصيده
والمقام كان من حروفك
كنت بوصف جوة لحنى
يوم جميل عشناه سوا
لما رحنا سيما مترو
كان فى يوم مليان هوا
أصل مارس طبعه بارد
وإحنا كان إحساسنا شارد
لسه فاكر
جبت م الشباك تذاكر
وإحنا بنمد الخطاوى
لجل نلحق عم شاكر
ماسك الكشاف فى ايده
وراح مشاور ع الكراسي
– : اتفضلوا
– : شكرا يا عمى
كانت اللهفة فى عنيا غصب عنى
أصله فيلم خيالى علمى
زى حلمى
فى إنى أهاجر
أصل كل حروبى فشلت
ويا منك
وإللي فاضل حل سلمى
المهم
يطفى نور الصاله فجأه
بس نورك كان حقيقي
مكانش وهم
كات إيديا فى حضن إيدك
راسمة كلمه كات إهم
ليه مشيتى
وليه رجعتى
وليه سؤالي مالوش إجابه
وليه سكتى
وليه بحبك
بحبك بس مش عارف
بحبك ليه
سألت كتير عن الأسباب
وروحت وجيت
فى سكة قلبك الدافى
وتهت أنا فيه
بحبك ليه
عشان يمكن بلاقى
روحى وياكى
عشان الضلمه حاوطتنى
وشايف نورى جواكى
ويمكن لما أحس بخوف
بغمض عينى وأتدارى
وأسيب احساسي يملاكى
فبطمن
وأرجع تانى وسط النور
يا ست الحور
بحبك ليه
سألت سؤالي 100 مرة
فى شكل جواب وف رسالة
وفى الحيرة على لسانى
200 مليون سؤال عنك
ولسه مفيش جواب جانى
وليه دايما بشوف قلبك
معاند قلبي وأنانى
قساوتك ليه معاندانى
وأنا وبرغم صوت صمتك
بحبك ليه
وبتمنى
تدفينى ف ليل بُعدك
200 مليون ألم بَعدك
فحنى بلاش عناد وبعاد
200 مليون قلم كاتب
بحبك ليه
وليه شايفانى أنا الجانى
وأنا مشتاق ومجنى عليه
وبسأل مرة من تانى
عشقتك ليه
200 مليون سؤال بعدك
وأنا قاعد
وبستنى
كلامى يوصلك فى الحال
وبتمنى
جوابك ييجى من تانى
ف أرجوكى تجاوبينى
بحبك ليه؟
