غادة حنفى
ساعات الواحد بيحصل ليه صدمات بيبقي مش عارف سرها ايه… حاجات اغرب من الخيال،،
انا فله مشكله حياتي ابويا بيشتغل دجال بيكسب حلو اوي…مافيش عريس بيرضي يجي ليا انا واخواتي البنات وكبرت وهتجنن نفسي اتجوز سني عدي الثلاثين،اتعرفت علي سواق توكتك مطلق وعنده ولدين …اسمه فرحات..
الاب:انا مش موافق عليه ده مطلق وعنده عيال؟!!
فله:علشان خاطري يابابا انا موافقه وبعدين ما صدقت جالي عريس وموافق عليا بعد ما عرف انك ليك… في السحر والأعمال..
الاب:نعم يا اختي ،وايه يعني ،احسن لك ما تخالنيش أحطه في دماغي واخاليه يمشي يكلم نفسه..
سيبته ومشيت وانا بعيط دخلت الاوضه أتكلم مع اختي نوسه.كل تفكرها في الاكل وبس لكن طيبه وهي الوحيدة اللي بحب أتكلم معها..
نوسه:خلاص بلاش لاحسن أبوكي يعمله عمل فعلا..
فله:انتي بتصدقي الكلام ده احنا هنضحك علي بعض أبوكي دجال ومافيش حاجه بيعملها صح ابدا..
نوسه:يا سلام ده في ناس بتجيله من محافظات كتير..
فله:دي ناس هبله ومصدقه الهبله اللي أبوكي بيعمله بلاخيبه انا والله لو ما رضيش لاطفيش واتجوزه بعيد عنكم..
فعلا كلمت فرحات واتفقت معاه اهرب ونتجوز لكن اليوم اللي كنّا هنتقابل فيه فضلت اتصل به ما رديش انا عارفه بيت امه روحت عندها اسال عليه لاقيتها خايفه مني
ام فرحات:والنبي يا بنتي مالكيش دعوه بابني تاني ولا تيجي ناحيته ربنا يكفينا شركم
فله:انا مش فاهمه في ايه يا حاجه..
ام فرحات:ابني وهو ماشي بالتوكتك جاله تليفون من أبوكي بيقوله انه يبعد عنك بعدها علي طول ابني عمل حادثه والتوكتك ولع وهو حالته صعبه في المستشفى احنا مش اد أبوكي ولا اد أذيته ابعدي عننا..
فله:ابويا ده دجال مش بيعمل حاجه انا لازم اشوف فرحات انا مش هسيبه..
فضلت امه تعيط وتترجي فيا لكن انا مصممه انا ابويا استحاله يعمل حاجه لاني اكتر واحده عارفاه ،روحت لفرحات المستشفى لاقيته تعبان اوي،حاولت أتكلم معاها افهم منه أي حاجه كل اللي قدرت افهمه منه اني أنساه خالص وابعد عنه لان عياله مالهميش حد في الدنيا غيره،،خرجت من المستشفى وفي دماغي انتقم من ابويا بس ازاي مش عارفه لاقيته قاعد كالعاده في البيت بيعمل الاعمال اللي بيعملها والنَّاس قاعده حواليه خايفين منه،مايعرفوش انه دجال ،قررت انه لما ينام اخد الكتب والحاجات اللي بيشتغل بيها.و أولع فيها واخاليه يتحسر علي عده النصب بتاعته،فعلا قمت وهما نايمين جيبت طبق الغسيل وحاطيت فيه الكتب والبخور والحاجات اللي بيشتغل بيها،ولسه هولعها لاقيت الكتاب زي ما يكون في كلمات بتنور احمر ،استغربت ببص عليها لاقيت مكتوب انا فله ابويا ولع فيا وانا صغيره بسبب سحره الأسود.واللي يقرا التعويذة دي هيخلص روحي من ايده.ويقدر يأذي أي حد متضايق منه بايدي..قريت التعويذة والأرقام والحروف المكتوبة لاقيت ظهر علي الحايطه صورتي وانا صغيره لكن في حروق في وشي ،عينيه زي الازاز،قلبي رفرف من الخوف مش قادره أقوم من مكاني لاغايه لما لاقيت ابويا بيولع نور الاوضه بص عليا ما نطقيش من الصدمه لانه شاف اللي شافته ،جمعت أعصابي قمت دخلت الاوضه كل شويه اسمع صوت خربشة وانا نايمه في الحايطه لدرجه ان اختي نوسه قامت من النوم ..
نوسه:انتي اكيد اتجننتي؟!!
فله:ليه؟؟
نوسه:عماله تصحي فيه وتقوليلي تعالي نطلع علي اسكندريه البحر وحشك؟!
فله:انا ؟؟!!!
نوسه:ايوه بحر ايه… اللي وحشك نص الليل اللي تنشكي وبتقرصني وانا نايمه ليه يا سافله من حتت عيب؟!!! الله يحرقك يا شيخه قلتي نومي..
فله:والله ما انا دديييي…؟!!
نوسه:لا بقولك ايه انا مجنونه برده لمي نفسك كده ونامي خالي الليله دي تعدي علي خير ،احسن لك عاوزه انام خالي عندك دم يا بت..
غمضت عين بحاول انام مش قادره من صوت ضحك طفله وخربشه في الحايطه اكتر من ساعه مش قادره أعصابي باظت لاغايه لما صرخت نوسه..
نوسه:لاء.. بقي انا من بكره هوديكي العباسية ده الظاهر موضوع فرحات ده خالي عقلك طار يا بت ..اهمدي بقي الفجر قرب يأذن مش عارفه انام ساعه علي بعض اقولك لو سكتي وسيبتيني انام هوديكي بكره ..البحر يلاه ..اختي حبيبتي الشاطره ..عاوزه انام ،،خالي عندك دم ..يقطع الحب وسنينه..
انا مش قادره انطق اقولها انا شايفه بنت شبهي وانا صغيره علي الحايطه بتضحك ليا وهي اللي بتعمل فيها كده،لاغايه لما النهار طلع ونوسه حكت لابويا وامي اللي حصل حاسيت ان ابويا عارف حاجه مش عاوز يقولها في سر لكن ايه هو مش عارفه انا بقيت اسمع أصوات بتتكلم في ودني طول الوقت روحت اسكندريه مع ابويا وأختي نوسه اللي حاولت افهمها مش قادره تستوعب فاكره ان أعصابي تعبانه علشان فرحات واحنا في اسكندريه لاقتني باخدهم في مكان هناك مش عارفه روحته ازاي عباره عن مقابر وقفت جنب تربه مكتوب عليها مدفون هنا فله عندها خمس عشر سنه،لاقيت نفسي بحفر جنب التربه اختي وأبويا مستغربين طلعت عمل مدفون في المكان سألنا التربي مين فله دي قال بنت ابوها كان بيعمل سحر وحرقها لكن كل يوم سبت التربه تطلع دخان لوحدها،فجاه الدنيا لفت بيا بعد ما سمعت صوت صراخ في وداني طالع من تربتها وعنوان لاقيته اتحفر علي ايدي ،وكلمة.. ألحقيني بدل ما تولعي انتي كمان؟؟
