غادة حنفى
يمكن الحكايه اغرب من الخيال لكن للأسف انا شوفتها وبقت سبب منغص عليا حياتي
سوما بعد ما قاعدت في المستشفى في غيبوبه وفاقت وحكت لجوزها وعيالها علي انها شافت الست الكبيره والبنت في شقتها بالليل فجاه بعد ما كانت شايفهم من البلكونه والست بتعيط والبنت بتتخانق معها..
صلاح:انا مصدقك لاني عرفت حاجات من الناس ماكنتيش اتخيل انها حقيقه
سوما:بجد
كارما:ايوه ياماما انتي لما أغمي عليكي.انا لاقيت البنت اللي اسمها لوليا دي واقفه في وشي بتضحك انا صرخت وجريت في الصاله،بابا خرج علي صوتي بنبص لاقيناكي واقعه علي الأرض
سوما:انا مش فاهمه حاجه فهموني
صلاح:انا عرفت ان الشقه اتباعت لست اجريجيه عاشت فيها مع حفيدتها قالوا ان حفيدتها اسمها لوليا بنت مستهتره ،طبعها غريب بيقولوا مره قفلت علي جدتها باب أوضتها وخرجت فضلت الست تصرخ وتعيط لاغايه لما الجيران كسرت باب الشقه دخلوا علي الست لاقوها تعبانه اوي من قله الاكل والأوضه رائحتها وحشه جدا لان الست كانت بتقضي حاجاتها فيها بلغوا البوليس لما جه لاقي البنت دي من الشباب اللي بيقولو عليهم عباده الشيطان..بيعملوا طقوس غريبه.. طبعا اتحبست شويه وخرجت الناس قالوا كان في عينها نظره انتقام ليهم..علشان بلغوا عنها،المهم خدت جدتها تاني في البيت لكن ما كانتيش ليها صوت زي ما تكون جالها حاله نفسيه أفقدتها النطق،
سوما:ياخبر ازاي الجيران سكتوا عليها وخالوها تعيش تاني معاهم
صلاح:ماهما شافوا انهم عملوا اللي عليهم وبلغوا البوليس الغريب ان لوليا جابت كلب كان بيعمل ازعاج للجيران لدرجه،مره
البواب:يا انسه لوليا الناس بتشتكي من صوت الكلب طول الليل مش عارفين ينامو
لوليا:أوعدك اني هخاليهم يناموا علي طول
وضحكت وسابت البواب ومشيت
كارما:عارفه الصوره اللي لاقيها اخويا وفيها الكلب،هو ده لان فعلا بيقولوا الكلب اختفي من عندها لكن الناس كانت بتشوفه في البيت والشارع بالليل شكله متغير وفي واحد من الجيران وهو ماشي فضل يجري الكلب وراه لاغايه لما عربيه خبطته
سوما:السكان راحت فين
صلاح:الاول السكان ابتدوا يحصل لهم حاجات غريبه شققهم تولع لوحدها يتخانقوا مع بعض مره جه ظابط علشان يطمن علي الست الكبيره مالاقهاش قالت له دي سافرت اليونان طبعا ماصدقهاش وحس ان في حاجه غريبه.. فضل يراقبها لاقي مره معها شاب سمع صوت صراخ فضل يخبط علي الباب لاقي حريق خارج من الشقه كسر الشقه هو والجيران الكل أكد انهم شافوا الست الكبيره ولوليا وهما بيتحرقوا حتي الظابط شافهم لكن للأسف اول ما النار اطفت اختفوا مافيش جثث الناس خافت
بعد كده كل يوم كانوا يسمعوا زينا صوت الست تصرخ خناق ضحك مش فاهمين في ايه تظهر حاجات وتختفي خافوا سابوا شققهم ومشيوا..
سوما:انا حاسه اني بتفرج علي فيلم رعب مش مصدقه؟؟
صلاح:خلاص احنا هنرجع بيتنا تاني
كارما:بس الاول نجيب حاجتنا من البيت
سوما:لا انا مش هروح تاني هناك
صلاح:للأسف لازم نروح علي الأقل نلم حاجاتنا من هناك
فعلا رجعنا تاني الشقه علشان اشيل الحاجات بتاعتي بس برده كل شويه اسمع صوت لوليا دي وهي بتضحك وجدتها بتعيط تقريبا لميت الحاجه بسرعه جدا انا وجوزي وعيالي لكن فجاه الانتريه ابتدا يولع فضلت اصرخ صلاح جري يجيب ميه. فجاه لاقينا مكتوب بالرماد حتي لو مشيتي مش هسيبك لاغايه ما ترجعي الحاجه اللي انتي واخدها؟؟؟’!!
سوما:انا ما اخدتيش حاجه
كارما:ولا انا
صلاح:تقصد ايه دي انا تعبت
ابني فضل يعيط ويرتعش..روحنا بيتنا وانا دماغي هتتشل من التفكير هموت واعرف قصدها ايه..بعد تقريبا أسبوع دخلت علي كارما اطمن عليها لاقيتها شكلها متغير شعرها فجاه بقي مجعد ومنكوش واقفه اودام المرايا
سوما:ايه اللي انتي عملاه ده
كارما:بقولك ايه ما تخنقنيش بقي وشوفي بتعملي ايه
سوما:انتي اتجننتي يا بت ازاي تكلميني كده
بصت ليا بصه كان عينها وشكلها أتحول بقت واحده تانيه اتكلمت كده بلغه مش مفهومه إنجليزي فرنساوي مش عارفه لكن اللي عارفاه اني فعلا خوفت سيبتها ودخلت الاوضه
صلاح:ايه مالك
سوما:البت لاقيتها نكشه شعرها وواقفه اودام المرايا بكلمها تقريبا غلطت فيا بالإنجليزي مش عارفه
صلاح:معقوله يعني تلاقيها بس قلقانه من الامتحانات
وفضل يضحك عليا.قولت بيني وبين نفسي يمكن فعلا علشان امتحانات الثانوية العامه دي بتبقي لعنه والعيال أعصابها بتتعب.. لازم استحمالها لكن بعد ما نزلت الامتحان دخلت الاوضه الاقي علي الأرض روسومات غريبه وعلي المرايا افتح الدولاب بتاعها لاقيت كتاب قديم ملفوف بقماش كتان لونه بني لِسَّه همسكه اشوفه حاسيت بكهربا في ايدي والدولاب اتقفل مش عارفه افتحه تاني حاولت كتير لكن مش نافع يتفتح ببص حواليا سمعت صوت كان كلب بيزوم قلبي وجعني خرجت مش عارفه اتصرف ازاي لما رجع صلاح حكيت له دخل الاوضه فتح الدولاب مالاقيش حاجه
كارما:بدور علي حاجه يا بابا
سوما:ايوه في كتاب كان هنا في الدولاب شكله غريب ملفوف بقماش وبعدين ايه الرسمه اللي علي المرايا دي امسحيها
كارما:كتاب ايه وخاليكي في حالك بقي انتي كل شويه تتخيلي حاجات الموضوع ذاد اوي..
صلاح:اخرسي يا بت وكلمني انا.. ازاي تكلمي امك كده
البت ابتسمت ابتسامه خبيثه اوي
كارما:انا اسفه
خرج صلاح وانا معاه مستغربه تصرفات البت اليوم ده صلاح دخل ينام جاتله ازمه دخل المستشفى قالوا ارتفاع مفاجا في ضغط الدم خرج من المستشفى بعد أسبوع لكن مش بينطق الدكتور قال فتره وهتعدي انا بقي مابقتيش قادره علي كارما اتغيرت اوي شكلها طريقتها في الكلام فكرت قولت اكيد الكتاب ده بتاع لوليا لازم أخده واحرقه دخلت الاوضه اخد الكتاب علشان أحرقه لاقيت جدته لوليا نايمه علي السرير مبتسمه ولوليا واقفه اودام المرايا..دخلت كارما الاوضه بتخبط علي ضهري ببص عليها لِسَّه بشاور لها علي السرير مالاقتيش حد حكيت لها اللي شوفته
كارما:ماما انا عاوزه اقولك حاجه انتي لازم تشوفي دكتور بقيتي تشوفي حاجات مش موجوده او نشوف شيخ يمكن تكوني اتلبستي من الشقه .علي فكره قبل ما بابا يدخل المستشفى روحت انا وهو عند شيخ وكان المفروض هيشوفك لان انتي بتقولي شوفتيني اودام المرايا وشعري منكوش وانا يا حبيبتي شعري قصير جدا أهوه وبلبس حجاب خصوصا بعد الثعلبة اللي جاتلي في راسي.بتقولي انك شوفتي كتاب ورسومات وحضرتك اللي كنتي بترسمي عندي في الاوضه ومحمد شافك وقال لبابا وانا اللي مسحت الرسومات اللي كانت علي الأرض وكمان بابا كان بيسمعك بتتكلمي مع حد وقام من النوم يكلمك،مخضوض عليكي روحتي ضربه ايدك في صدره جامد وقع علي الأرض.. لما خُف وقام كتب ليا علشان اخلي بالي انا ومحمد.حاسيت الدنيا بتلف بيا وكانها بتتكلم عن واحده تانيه فضلت أفكر،ياتري انا اتجننت او اتلبست زي ما بتقول ولا هي اللي عاوزه تجنني خصوصا ان صلاح بقي تعبان ومش قادر يعمل حاجه وهي اللي اتلبست فعلا وعاوزه تسيطر عليا ؟؟!!
