غادة حنفى
دايما الناس تقولك كل واحد ليه نصيب من اسمه انا بقي اسمي سعيدة.يعني ليا نصيب كبير مع ان اسمي ده ياما عاملي مضايقات.اللي يحب يستظرف ويقولي يا هابي،واللي يقولي اسمك ايه أقوله سعيده يقولي سعيده مباركه.المهم مش هطول عليكم وادخل في الموضوع انا عايشه مع امي وابويا حسني عبدالكريم،رجل موظف غلبان زي باقي الناس ليا اربع اخوات بنات كان نفسه في ولد مش عارفه ايه الحكمه في الرجاله اللي مشتاقة تخلف ولاد.انا دخلت الثانوية العامه وكنت عامله حسابي علي كليه طب لكن للأسف دخلت خدمه اجتماعيه،قولت في نفسي ولايهمك يابنت خدمه اجتماعيه يعني دكتوره نفسيه وأقنعت نفسي بكده،كنت محظوظه جالي شغل في مركز تأهيل نفسي للبنات،(ده للبنات اللي بتاخد مخدرات وتيجي تتعالج فيه.او اللي عندهم أذمه نفسيه))بصراحه هو مركز كبير وكل البنات والستات اللي فيه من طبقه غنيه،انا اشتغلت في المركز عن طريق واحد زميل بابا في الشغل.في يوم اتاخرت في الشغل بسبب بنت اسمها ناريمان مرتبطه بيا وبتحبني والدكتور قالي أفضل معها لاغايه لما يرجع لان بتجالها نوبات تشنج وساعات بتبقي عاوزه تخنق نفسها،الاول كنت فرحانه لان حاسه نفسي اني بمارس مهنه الطب زي ماكنت عاوزه.المهم اتاخرت والحظر بدا فاتصلت بابويا وكان مضايق أوي حاولت أقنعه اني مش هلاقي أي موصلات علشان ارجع خصوصا الشغل في التجمع وانا عايشه في امبابه.والدكتور عاصم كلمه وقاله مايقلقيش المركز كله حريم وانا هنام في غرفه،اليوم ده ماعرفيتش انام فضلت مع ناريمان لاغايه لما نامت قولت أقوم اعمل سندويتش وكنت متابعه مسلسل تركي وهناك في المركز مشتركين في كل القنوات اللي بتعرض المسلسلات بدون إعلانات،فرحت وقولت فرصه اتفرج علي المسلسل اللي بحبه،،خرجت من الاوضه علشان اروح المطبخ اعمل سندويتش اتفاجأت ببنت اول مره أشوفها كانت قاعده في الضلمه عند باب المطبخ قربت منها،وقعت جنبها
-حبيبتي مالك قاعده كده ليها
لِسَّه هحط ايدي عليها ولاقيت قلم نزل علي وشي (الدنيا ضلمت فجاه في عيني))قمت وقفت وببص تاني عليها لاقيتها اختفت
-اه يا جزمه يا بنت الجزمه راحت فين دي؟؟!!
الضربه علي وشي وجعتني ..ببص حواليا لاقيت جنب باب المطبخ باب بيطلع علي الجنينه..
-اكيد هي خرجت من هنا
خرجت أدور عليها الدنيا كانت ضلمه مافيش غير نور سُوَر الفيلا هو اللي منور ونوره ضعيف اوي.ولعت نور الموبيل لاقيتها في وشي بتضحك
-انتي بتضحكي بعد ما ضربتيني،انتي ايه اللي مسهرك كده؟؟تعالي يلاه وريني
أوضتك
مسكتني من كتفي جامد وبصت في عيني اول مره اشوف عين سوده مافيهاش أي بياض حوالين زيتونه العين
=انتي غبيه.. انا يارا.
-اوعي ايدك وجعتيني طب تعالي معايا يا يارا نروح أوضتك
=انتي اللي لازم تروحي أوضتك دولوقتي احسن لك
الموبيل رِن ببص فيه لاقيت اختي ساره لِسَّه هرد عليها لاقيت يارا اختفت
-راحت فين دي بِسْم الله الرحمن الرحيم
=مين يا بنت اللي راحت فين
اكتشفت اني فتحت الخط علي اختي قولت أكلمها أتونس معها
-مش عارفه اقولك ايه تقريبا في واحده مجنونه جت المركز جديد اسمها يارا ضربتني يا اختي بالقلم واختفت
=احسن تستاهلي فاكره نفسك دكتوره ده انتي خدمه اجتماعيه يابت لمي نفسك
المهم شوفيلك دكتور شاطر تتجوزيه اهو تخرجي من المركز بعريس
-بطلي هبل عريس آيه كلهم متجوزين ريحي نفسك
=فقريه من يومك مش عارفه سموكي سعيده ليه
دخلت المركز ومعايا اختي الرغيا علي التليفون لاقيت في وشي ام محمود اللي شغاله في المركز بقالها سنين بس فتره بالليل وبالنهار بتروح قفلت مع اختي وجريت عليها
-ام محمود استني عاوزه اسالك علي بنت جديده هنا
=مافيش بنات جم جدد بقالنا فتره
-اسمها يارا
تتخض ام محمود
=يارا مين؟؟
-بنت طويله شكلها حلو شعرها اسود طويل وعينها سوده
تضع ايدها علي صدرها من ألخضه
ام محمود:اللي بتوصيفها دي يارا وماتت هنا في المركز من اربع سنين
بصراحه انا خوفت اوي
=يعني انا شوفت شبح واتكلمت معاه؟! هي ماتت ازاي ؟؟
-دخلنا عليها الصبح لاقينها معلقه نفسها في الاوضه بملايه خنقت نفسها
طبطبت عليها ام محمود
=انا بقالي فتره كبيره هنا في المركز عمري ماشوفت ولا سمعت عن اشباح وعفاريت يمكن حد حكي ليكي عنها وانتي اتاثرتي بيها وشوفتيها في خيالك
طبعا مش قادره استوعب كلام ام محمود روحت الاوضه عند ناريمان اللي كانت لِسَّه نايمه وقاعدت اتفرج علي التليفزيون وخوفت ادخل الاوضه اللي المفروض انام فيها لاغايه لما رجع الدكتور عاصم تاني،لانه ساكن في الفيلا اللي جنب المركز فسهل يروح ويجي علي المركز
الدكتور عاصم:انتي لِسَّه ما نمتيش
سعيده:اصل ما جاليش نوم قولت أسهر شويه جنبها يمكن تقوم تكون عاوزه حاجه
الدكتور عاصم:روحي نامي الساعه داخله علي اتنين وانا هبقي ابص عليها وعلي باقي البنات
قمت ودخلت الاوضه وانا قلقانه فتحت الموبيل علي الفيس لاقيت يارا في وشي
دخلت علي صفحتها اد ايه بنت جميله ورقيقه ليها صور كتير،استغربت ازاي بنت بتلعب رياضه وبتحب الحياه زي ماهو باين في صورها تبقي مدمنه وتنتحر،لكن لكل قاعده شواذ.قفلت التليفون بحاول انام لاقيت الحايطه زي ما تكون بتتحرك ركزت شويه الصوره بقت أوضح الدكتور عاصم بيحاول يغتصب يارا صحيت من النوم شافتيه لِسَّه بتصرخ حط ايده علي فمها ماتت،،قومت مفزوعه من اللي شوفته ووضعت ايدي علي فمي من هول ما رأيت..
اقتربت يارا.. ووضعت ايدها علي كتفي وهمست في أذني
=مش انا بس في كتير غيري..اوعي تسيبي حقنا يضيع؟؟
جسمي كله بيترعش نفسي مقطوع مش عارفه أفكر انا بحلم ولا ده حقيقه ايه آلللي بيحصلي ده،اهرب من المكان ،ولا اكمل واكشف الدكتور الحيوان ده بس ياتريً اللي شوفته حقيقي ولا خيال تفكيري اتشل.سمعت اذان الفجر قمت علشان اتوضا واصلي.بعد ما خلصت قررت اني امشي ومارجعيش تاني انا ناقصه اشباح وجنان لاء انا هشوف شغل في حته تاني ان شاالله اشتغل بايعه في محل.روحت وانا مقرره مع نفسي وبلغت أمي وأبويا علي قراري هما زعلوا شويه لان المرتب كان كبير لكن بابا قالي راحتك اهم.دخلت أوضتي انام بفتح الدولاب علشان أغير لاقيت يارا في وشي صرخت دخلت اختي ساره تجري
-في ايه مالك؟؟
=بصراحه انا شوفت عفريت
فضلت تضحك ومش قادره تتكلم
-عفريت حلو ولا شبحك كده
مارديش عليها سابتني وراحت كالعاده علشان تحكي للبيت كله.جلست علي السرير خايفه نور الاوضه اطفا لاقيت بنات واقفه ورا يارا اللي قربت مني
-احنا مش هنسيبك غير لما ترجعي تلحقي باقي البنات اللي هناك
مش عارفه اعمل ايه ارجع وأكمل ولا أفضل كده هتجنن ياتري حقيقي اللي بيحصلي ده ولا انا بقيت مريضه وبتخيل؟؟!!
