كلمات الشاعر /محمد صبحي
مانيش فارس
ولا فى أحلامك الخضرا
ولا فى قصرك أنا حارس
ولا رافع علم جيشك
وعمرى ما كنت درويشك
ولا إستنيت صلاة الفجر
فى السقعه
وأنا عينى علي بيتك
وأنا بدعى
يجمعنى بعنيكى مكان
وقلبي عمره ما إتأثر
بدمعه تكوى خدينك
وقلبي قالك إرتاحى
أنا قاسي
وإحساسي
ده مش موجود
وعندى من النكد فدان
وعندى برود
وباقى الوصف غير مجدى
لانى لسانى أدامك
كخيط معقود
وده يمكن لأن العقل متكتف
وكان عنده خيال محدود
ورغم ده كله حبيتك
وحطيت الجيوش جمعا
فى سطر قصيدة مجنونة
وإسمك كان أكيد موجود
فى الإستهلال
وكان مكتوب بخط كبير
وجنبه هلال
وكان حاضن حروف إسمك
وجنبه عيال
وجنبيهم حروف إسمى
فى خانة الأب
وع الحيطه لقيت شخابيط
وفزورة وألف سؤال
إذا وصفى علي قولك
مانيش فارس لأحلامك
وعمرى ما كنت مجنونك
وعمر عطيل ما كان شبهى
ولا أصبحت يوم عنتر
ولا أمسيت وزير العشق
فى جفونك
وعمرى ما كنت فى الثورة
من الثوار
علي حدودك
قوليلي إزاى رسمتينى
فى فزورتك
وقلتى عليا أنا شمسك
وفى الآخر حلفتيلي
وقولتيلي
حبيبي إوعى تنسانى
وإوعى تصدق التخاريف
علي لسانى
وإغفر كدب هجرانى
وإوعى تقول مانيش فارس
عصيت قلبك وعاندته
وتبت حبيبي وإتوضيت
علي إيدك
ومن إيدك
بدأت حبيبي غفرانى
