كادر فاضى

كلمات الشاعر /محمد صبحي

الصحبه مــش بالعـدد

الصحـــبه بإللي يســد

وأنا ياما شــلت حمول

وأنا عمرى يوم ما أتهد

بس التعب مسِّنى

والفكر فاق الحد

والناس كما الأعتاب

بيبانو وقت الجد

فى عتبه بتكعبلك

تجرح قدم حلمك

وغيرها بينكدك

تنسي حروف إسمك

وعتبه زى المطر

تغسل سواد قلبك

تمسح دموع فكرك

وتشيل معاك همك

الحب بين الناس

يا ناس كما الترياق

يغلب فى أتخن وجع

حتى الوجع.. أرزاق

والرزق فى العلاقات

زى الطريق مرسوم

ونهايه المشوار

صدقنى مش معلوم

ليكون بداية خير

ليكون وجع مكتوم

والبوح ساعات بيموت

علي عتبة مكسورة

وكادرك المليان

مفيهوش ولا صورة

الكادر فيه كلمتين

عايشين لآخر الأمد

الكلمتين كانو……

الصحبة

مش

بالعدد