غادة حنفى
كل لما اشوف اتنين باين اوي من افعالهم وكلامهم انهم بيحبوا بعض.اعرف علي طول ان دي سعادة مزيفه والحب الحقيقي هو المخفي اللي ماحدش يعرف انهم بيحبوا بعض..
فاكره اول يوم دخلت فيه الجامعه كنت حاسه نفسي فعلا اجمل بنت في الكليه كان باين اوي في عيون زمايلي حتي في بيتنا انا كنت احلي اخواتي انا ليا أختين نهي وداليا وأخويا مصطفي ده بقي دولعه العيله لانه الولد الوحيد كان بيجيلي عرسان من وانا في الثانوية العامه..لكن بابا كان مقتنع ان لازم اكمل تعليمي واشتغل لان ده السلاح الحقيقي لأي بنت في الدنيا.مع اني ما كانتيش مقتنعه برأيه ..لكن هعمل ايه.اختي كانت خايبه اوي بتحب سامي ابن الجيران..شكله حلو لدرجه ان في بنات كتير كانت بتحاول ترتبط به.وتكلمه كلنا كنّا عارفين ده!!
سمر:يعني انتي متخيله ان سامي ده بيحبك استحاله؟!
نهي:علي فكره هو مش شايف غيري..
طبعا هي عايشه في الخيال..سمعنا صوت خبط في البلكونه جريت من جنبي.قمت اشوف في ايه لاقيته هو كان بيحدف المشابك في البلكونه علشان تخرج تكلمه.استغربت جدا اختي نهي دي تقريبا مش حلوه خالص ومحجبة لان شعرها وحش اوي ومرخيرها كبيره وعندها جبهتها عريضه.حتي كنّا بنقعد نتريق عليها واحنا صغيرين.بس هي طيبه شويه.بابا بيقول دمها خفيف مع ان ابدا دمها سم أصلا.المهم لاقيت في عينه نظره حب بجد..
نهي:انت مجنون ماما تشوفك انا مش عاوزه مشاكل ما انت لِسَّه مكالمني في التليفون
سامي:كلمتك بس عاوز اشوفك من امبارح ماشوفتيش عينيكي وحشاني اوي
غصب بعني فضلت اضحك.واكلم نفسيسمر:عينها ايه دي شبه ..عين اليابانيين ..مجنون الواد ده اكيد!!
ولاقيته حدف لها لفه
سامي:عاوز اشوفك النهارده والبسي دي .بحبك
خدت منه اللفه وهي فرحانه انا اتغظت نهي الجربانه… سامي اللي زي الأقمر.وجسمه شبه فان دام.. بطل كاراتيه..اكيد في حاجه غلط.روحت لماما المطبخ
سمر:ماما قولي ل بنتك نهي تلم نفسها واقفه في البلكونه مع اللي اسمه سامي اللي شايفه نفسه بعضلاته.بتضحك معاه واخر قله ادب
ماما:اتجنينت دى ولا ايه احنا ناقصين فضايح
فعلا ماما دخلت عليها الاوضه لاقيتها واقفه اودام المرايا ماسكه ايشارب اخضر في ورد شكله بلدي اوي.جابتها من شعرها
ماما:انتي اتجننتي يا بت اومال لو حلوه شويه كنتي عاملتي فينا ايه.مالك ومال سامي هو احنا أده
سمر:ايه ماما ليه بقي هما مين يعني
ماما:انتي هبله انتي كمان ده امه مديره في التأمينات وابوه مدير في وزاره الشباب والرياضة ده انا سامعه انه مسافر ياخد بطوله عالميه.. احنا بقي مين أبوكي موظف ومش لاقين يا دوب عايشين بالعافيه شيلي الواد ده من دماغك فاهمه احنا مش ناقصين فضايح..
راحت ماما المطبخ ونهي فضلت تعيط دخلت داليا علينا
داليا:انا مش عارفه ماما مكبره الموضوع ليه .وبعدين هي عرفت ازاي؟
سمر:هي شافتها واقفه بتكلمه من البلكونه كان بيديها لفه هي ايه اللفه دي
نهي:كان جايب ليا الايشارب والبرفان ده معاه..
سمر:الله البرفان ده ماركه يا محظوظه هاتي كده وريني..
داليا:هو بيحبك بجد
نهي:اه والله انا متأكده هو ناوي يتقدم ل بابا بعد البطوله واخد شقه في مدينه نصر
سمر:ايه هما هيمشوا من المنطقه الزفت دي؟
نهي:لاء انتي عارفه ده بيت جده وابوه مش عاوز يسيب المنطقه اللي أتربي فيها
سمر:بصراحه ناس متخلفه معاهم فلوس يقدروا يعيشوا في مكان أرقي من المنطقه الشعبيه دي ناس غاويه فقر..
داليا:بصي سيبك من ماما هي خايفه عليكي المهم انتي عاوزه ايه.
نهي:انا بحبه اوي من أيام ما كنّا في الإعدادية مع بعض..
سمر:يا لائيمه ده من زمان اوي يعني لما دخلتي الجامعه ما شوفتيش حد غيره
نهي:انا مش شايفه غيره.عارفه هو اللي بيجي ياخدني بالعربيه من الجامعه نرجع سوا،بيخاف عليا من الموصلات وساعات كمان بيوديني الصبح
سمر:يخربيت عقلك افرضي بابا شايفك
نهي:لا ماهو بيستناني في الشارع اللي ورا
داليا:عموما خالي بالك من نفسك
فضلت هي وداليا يتكلموا انا بحب اختي لكن مستغربه معقول حظها حلو كده اومال انا بقي اللي احلي منها اكيد حظي هيبقي احسن الف مره ممكن أتجوز دكتور.فعلا سامي اخد بطوله الكاراتيه وأتقدم لأختي واتعمل لها فرح كبير مع اني كنت احلي من العروسه وأي واحده في الفرح.لكن كنت فرحانه لأختي .. بعد الفرح لاقيت سواق توكتك في المنطقه بيكلم بابا عليا هو معاه بكالوريوس تجاره بس سواق توكتك وجه البيت هو وامه.طبعا انا رفضته.خلصت الجامعه واشتغلت في شركه كانت ساعتها نهي اتجوزت وسامي اللي جاب ليا الشغل.نهي حملت في تؤام شكلها بقي اوحش من الاول الغريب ان سامي بيعاملها علي انها ملكه جمال الموضوع بقي مستفز بالنسبه ليا.
سمر:نهي خالي بالك جوزك يعرف بنات انا شوفته عندنا في الشركه بيكلم واحده وكمان عرفت منها انها عرفته عن طريق واحده كان يعرفها وهي بنت شمال أصلا
نهي:انتي متأكده.
مش عارفه ليه عملت كده وكذبت عليها هي من كتر الزعل كانت في الشهر الثامن زعلت وضغطها ارتفع فجاه جالها تسمم حمل من الزعل دخلت المستشفى كانت حالتها خطيره حاسيت ساعتها اني غلطت لكن برده ازاي هي عايشه كده وانا الاجمل وكملت في الكليه وهي لاء ،واشتغلت لاغايه دلوقتي بيجيلي عرسان مش اد كده..وهي عايشه مع راجل وسيم وبيحبها ايه الظلم ده.خرجت من المستشفى بعد ما التؤام ماتوا في بطنها من الضغط العالي لان جالها جلطه من الزعل مش عارفه ازاي بتحبه اوي كده لدرجه ان الزعل يعمل فيها كده..هو بقي كان تقريبا تحت رجليها مش سايبها لحظه بيصلي ويدعي ربنا كتير علشانها.مش عارف بيحب فيها ايه..الغبيه قالتله اني قولتلها علي الموضوع اللي زعلها.. فضل يحلف لها اني بكدب انا طبعا اتخانقت معاها .بابا وماما كانوا في صفه وقالوا ان اكيد اللي قالت لي كده كدابه وعاوزه تخرب علي اختي لكن هو حلف علي اختي انها تقطع علاقتها بيه.بابا زعل عليا لكن هي وافقت جوزها يتحرقوا هما الاتنين اللي زعلني اكتر عرفت ان العريس اللي جابه لأختي داليا كان أصلا جايبهولي بس لما حصلت المشكله جابه ل داليا عريس مهندس صاحبه .ابن ناس اوي اختي داليا ما كانتيش مصدقه نفسها.. طبعا ماهي كمان شكلها مش حلو أصلا خريجه خدمه اجتماعيه بتشتغل في مدرسه.انا احلي منها الف مره .اتجوزت في اقل من شهر لانه كان جاهز حظها نار..انا بقي العمر بيجري اخواتي خلفوا وانا اللي قاعده ليه مع اني احلي منهم بكتير ..شعري طويل عينيه واسعة بعرف البس وأتكلم.سكرتيره في شركه باخد مرتب محترم.ليه حظي اقل منهم واغلب اللي يتقدم ليا رجاله مش زي اللي متجوزين اخواتي بحس انهم اقل منهم انا اخد واحد اقل من اختي ليه يعني؟؟ نفسي يولعوا كلهم هما اللي أخدوا حظي من الدنيا..بس بكره أصلا يعرفوا ان مافيش حاجه اسمها حب واللي عايشين فيه ده وهم؟!
