سبع مشاهد عجاف

كلمات الشاعر محمد صبحي

نص الحياة مكتوب

من يوم ما جيناها

نبدأ ببسم الله

ربي اللي سواها

وهقول كلام محسوب

علي دنيا عشناها

وقدرنا بيحدد

والنص علي أمره

من يومه كان مغلوب

والقصة انا هقولها

قصة بكااااااام مشهد

…..

المشهد الاول

كانت بدايه وجع

مخلوط مع الفرحه

واقف هناك دكتور

والخلقة كات سمحة

بيقول لامى افرحى

بسلامة المولود

هيكون هنا فى الحال

فى اقل من لمحة

ونزلت للدنيا من

ضيق تلات ظلمات

اسمى اتكتب فى النص

كان تحته عنوانى

تحتيه يادوب سطرين

…..

المشهد التانى

اول كلام بسمعه

والضلمة كات بتخف

فرحه بوسع الكون

وعيال تدور وتلف

مع دق ايد الهون

وانا كنت فى الغربال

باخد علي الصدمات

رغم انى اد الكف

وسمعت صوت مسنون

جايلي بينصحنى

اسمع كلام امى

دايما ومهما يكون

وانا نظرى كان ثابت

علي باب وفجأة اتفتح

……

علي

المشهد التالت

ولاقيتنى وسط طابور

بينادو فى اسامى

كان العلم مرفوع

والسارى ادامى

وورايا كان الجرس

عالي كاحلامى

وقالولى ان العلام

ده سلاح لايامى

فذاكرت واهتميت

وحلمت واتمنيت

وفى وسط ما انا بحلم

دق الجرس ف صحيت

وسمعت تانى الهون

يعزف على الذكرى

اسمع كلام اهلى

وارجع اوام ع البيت

….

والمشهد الرابع

ريحه البخور وادان

وابويا بيصلى

والخير فى كل مكان

واخواتى باصين لى

بحنان و حضن امان

والراديو كان شغال

شاهد علي الازمان

نسمع ونتعلم

والضحكة تملانا

والدمعه جوانا

لما سمعنا الجرس

والقلب كان حاسس

بحاجات كتير حصلت

فى المشهد الخامس

……

والمشهد الموعود

مشهد غريب وعجيب

كله امل ووعود

توعدنى الاقى حبيب

انسي اللي فات وياه

ويكونلى احلي نصيب

ويجيلي فى الاحلام

يرسم حدود الكون

قبل اما ييجى الشيب

وبرغم ان النص

مكتوب من الاول

كان لازم التغيير

والدفة تتحول

من سطر كله امل

ولسطر كان شارد

مليان سنين توهان

بين الامل والشوق

والجرح والخذلان

والدفة لو مالت

يبقى الخيال دبلان

ومفيهش روح تحييه

وخلاصة المشهد

قلب الحبيب باعنى

وماليش حبيب بعديه

والمشهد اللي اتكتب

بعد اللي راح منى

مكتوب بنفس الوجع

زى اللي كان قبليه

…..

المشهد السادس

بدلة وعلم ونشيد

وانا وسط جيش بلدى

والنص خدنى بعيد

عن كل خلانى

عن ذكرى ألمتنى

أو كلمة وجعتنى

عن كل شئ قد كان

المشهد المكتوب

رجعنى زى زمان

احلامى غطتنى

بعباية منسوجة

بخيوط من الالوان

فيها البياض اخلاص

اد السواد لو خان

والاخضر المغلوب

محبوس ما بين جدران

لونها سواد الوجع

من فرقة الخلان

والقى البياض فى العلم

فوق السواد نعسان

فوقهم ده لون دمى

لو مرة سال فرحان

يكتب حروف اسمى

فوق الشهاده بنور

ويقول عليا جسور

كان حلمه بس يعيش

مشهد قديم فى العمر

ترتيبه فى الاحداث

المشهد الرابع

والنص فجأة اتكسر

للمشهد السابع

ولقيت سواقى كتير

مربوط عليها الناس

اختارتلى ساقيه

وعملت حلمى مداس

اصل الوصول مرهون

والحلم ليه حراس

بيدوسو علي ايده

ويحطو ميه ترباس

علي حرف كان مكتوب

علي سطر جوه النص

اللي اتولد مغلوب

وانا كنت بس يادوب

سطرين فى صدر النص

فصبرت لما اكبر

والصبر بيا يحس

وفى وسط ما انا صابر

صبري اتقسم بالنص

نصين صايبهم وجع

بينهم فضلت ابص

علي دم كان سايل

ابيض واسود بس

مع ان لون العلم

اصلا تلات الوان

بس الخيال دايما

ابيض بلون الحلم

واسود كليل نعسان

علي باب سطور مشهد

عن حد عاش خسران

سبع مشاهد عجاف

والنص مات كسبان

والحكمة فى الآخر

نص الحياة مكتوب

رحمة من الرحمن