رئيس مجلس التحرير

خالد فؤاد

رئيس التحرير

عمرو فارس

إشراف عام

أحمد شلبي ونرمين حمزة

رومانسيه تايهه ياولاد الحلال


46
الأحد 20 يونيو 2021, 12:20 م


كتبت : رانيا كمال العربى

بقلب في التلفزيون لقيت مشهد رومانسي علي قناة ناشونال جوغرافيك !!
وانا اعز الرومانسيه اوي
واحد جايب هديه لحبيبته…الله عالرومانسيه..وجاي ياعيني متبهدل عالاخر تقريبا طلع عينه علي ماعرف يشتري لها حاجة…
وبعدين بيقدم لها الهدية اللي هيا عبارة عن عقد
وهيا بقي فرحت اوي ياعين امها بالهديه وقالتله:
_انها اول هديه منك حلية جميلة
رد عليها وهو فرحان بنفسه اوي: نعم انها من راس حيوان متعفن
قامت هيا ردت بفرحة: يا لجمالها !!
قام قايل لها: نعم انها نتنة قليلا
ياتكوا القرف انتوا الجوز!! حيوان متعفن ونتنه وفرحانين اوي !! يخيبكم
هيا دي الرومانسيه عندكم !! طب ده انا من ساعه ما شفت الحلقه وانا مش قادرة احط لقمة في بقي !! ده ايه الحب المنيل بستين نيلة ده !!
وقلبت جبت قناه تانيه لقيت مسلسل عبد الغفور البرعي
كان تعبان وهيا مودياله الاكل في المستشفي
وبتتحايل عليه ياكل
ويقولها خلاص شبعت
وهيا تقوله لازم تكمل الاكل
ويقولها يافاطنة مش قادر
قالتله: تعدمني!!
فاضطر ياكل وهو شبعان
وقالها: مش عارف كنت هعمل ايه من غيرك يافاطنة؟

وقلبت علي مسلسل تركي
لقيت البطل حبيبته في السجن
وعشان يفرحها جاب بالونات وراح مطيرها جمب السجن
عشان تشوفها وهيا محبوسه فمعنوياتها ترتفع واحنا معنوياتنا تنخفض واحنا بنتفرج !!
واللي عجبني في المشاهد دي ان كل واحد فيهم بيعمل اللي يقدر عليه عشان يسعد التاني.. يعني مش لازم يشتري لها قصر ولا عربيه اخر موديل!! المهم يشوفوا بعض مبسوطين ومرتاحين..اقل وابسط حاحه تفرحهم…كلمة حلوة او اهتمام او بالونات او شكولاتايه..
المهم انه يعمله حاجة …اي حاجة…
ممكن تكون حاجات غريبة وبسيطة و تفرحهم حتي لو غيرهم شافها مش منطقيه !! المهم تبذل أي مجهود عشانه..
حتي لو المجهود ده انك تسمعه وتسمع مشاكله!! و الغريبة انك لما بتحب حد مش بتحس انك بتبذل مجهود اصلا لانك بتعمل كل حاجة بحب…الحب والاهتمام مش محتاجين مجهود كبير ولا فلوس كتير…?
ماريان كييس قالت الحب لا يمكن ان يقاس الا بالافعال بل ربما الحب امرا صغيرا كأن تقشر برتقاله لشخص تحبه،فقط لأنك تعلم أنه لايحب فعل ذلك.?
ولما سألوا اطفال ايه هو الحب في نظركم؟ كانت اجابتهم قريبه من كده
فيه طفله قالتلهم: لما بشوف ماما بتدوق القهوه الاول بالمعلقه قبل ماتديها لبابا عشان تتاكد انها لذيذه?
وطفل تاني قال: الحب هو انك تعطي لصديقك معظم البطاطس المقليه الخاصه بك دون انتظار ان يعطيك من البطاطس الخاصه به?
وطفل تالت قال: الحب هو انك تخبر احد ان هذا القميص جميل عليه ويظل يلبسه كل يوم لاجلك..?

الفكره انك لما بتحب حد بتحب اي حاجة منه وبتشوفها احلي واغلي حاجة في الدنيا حتي لو كان عقد من راس حيوان متعفن??


كواليس هي مجلة فنية رياضية تصدر عن مؤسسة كواليس. تأسست المجلة سنة 2019