غادة حنفي
الحقيقه دايما بتبقي صعب ان حد يصدقها لكن في النهايه هي واقع لازم نعيشه ونتعايش معاه…
انا حكايتي ابتديت لما بنت اختي راحت الدرس كالعاده ومارجعتيش هي واصحابها من هنا بدات رحلتي في البحث عن بنت اختي واصحابها واكتشفت
ان في بنات كتير بتختفي وأهلهم بيدوروا عليهم. قررت اني ابدا رحلتي في البحث ذهبت الي اهل احد البنات المختفيه علشان اعرف اختفت ازاي وقابلت ام كريمه ست غلبانه اوي شكلها مغلوب علي امرها .عرفتها بنفسي
حياة:انا عاوزه اعرف ازاي كريمه اختفت
ام كريمه:هي اخر مره كلمتني كانت جايه من الدرس
حياة:عملتي محضر في القسم
ام ندا:لاء انا عارفه ان بنتي سابت البيت وطفشت
حياة:نعم!!!انتي متأكده
ولسه بكمل كلامي معها سمعت صوت بنت بتصرخ قامت جريت علي الاوضه قمت ورآها هي شقتها بسيطه جدا،لاقيت بنت نايمه علي السرير بتصرخ أمها بتحاول تمسكها لانها عاوزه تأذي نفسها حاولت أساعدها راحت مطلعه حقنه وأديتها لبنتها ابتدت تسكت وترتاح انا قريت الحقن لقيتها لمرضي الصرع
ام كريمه:دي اخت كريمه ثناء كنت طالبه في كليه التجارة شايفه جلدها بقي شبه اللي عندهم (مرض البرص)ازاي مع انها كانت جميله ومتفوقة،
وهي بتحكي حاسيت ان ثناء بتبصلي بعينها وكانها بتطلب مني اني أساعدها شعور غريب دخل قلبي اول ما شوفتها
حياة:انا ممكن اقدر اساعدك انتي ليه بتديها حقن صرع هي عندها صرع
ام كريمه: لا ماعندهاش صرع
حياة:اومال انتي بتجيبي الحقن دي منين ،،ده ممنوع صرفها لازم بأمر الدكتور
ام كريمه:هو ابن عمها دكتور في صيدليه وهو اللي بيديني الحقن وعلمني ازاي اضربها ،وبصراحة لما بتاخد الحقن بتنام وتبقي كويسه
حياة:بس ده غلط لان الحقن دي بدمر خلايا المخ خصوصا لوحد مش عيان بالصرع
ازاي دكتور يعمل كده ويصرف حقن من نفسه ..
ام كريمه:هو بصراحه مش دكتور هو شغال في الصيدليه من زمان بس احنا بنعتبره دكتور وبعدين هو الوحيد اللي واقف معايا ومش سايبني كتر خيره
حياة:طب أحكيلي ايه اللي حصل ل ثناء ووصلها للمره دي
ام كريمه:انا بعد ما أبوكريمه مات ماليش في الدنيا غير كريمه وثناء.. سامي ابن عمهم معجب ب ثناء.. وهو خريج دبلوم صنايع واشتغل في صيدليه الدكتور عزت بس ثناء بنتي كان هدفها انها تكمل تعلمها وتشتغل وفعلا لما نجحت في الثانوية العامه دخلت كليه التجارة جامعه القاهره.. سامي ساعتها كان عاوز يتجوزها وتكمل تعليمها في بيتها بس هي مارضيتش ورفضت.. اصل شخصيتها قويه لاغايه مافي يوم راحت تزور ابوها في المقابر. هي وسامي واتاخرت انا قولت تلاقيها مع ابن عمها اتصلت عليها لاقيت تليفونها مقفول اتصلت عليه قالي انه من بعد ما اتخانقت معاه في المقابر سيبها ومشي.. فضلنا انا وهو وأختها ندور عليها لاغايه تاني يوم بالليل لاقيت سامي بيكلمني ويقولي تعالي يا مرات عمي انا لاقيت ثناء..كانت وقعت في مقبره وأغمي عليها والتربي وهو معدي لاقي المقبره مفتوحة قفلها وماكانيش يعرف انها وقع فيها ..تاني يوم بالليل ناس معديه في المقابر سمعت صوت حد بيصرخ فتحوا لاقوا ثناء ومن ساعتها وهي كانت بتصرخ وتعيط رحت بيها المستشفى الدكتور قال حاله نفسيه من الليله اللي قضيتها في المقابر وكتب لها علي علاج سامي هو اللي جابه وكان الاول بيحي يديها العلاج وبعدين علمني ازاي ادي حقن علشان علاجها طول هي علي الحال دي بقالها سنتين ..وانا ما بعرفش اقري ولا اكتب
حياة:طب وريني العلاج اللي بتاخده
فعلا شوفت كارثه بتاخد علاج يدمر خلايا المخ استحاله حد يستعمله حتي لوكان مريض لان في ادويه لما تتاخد مع بعض بتعمل خلل في الجسم والأعصاب
حياة:معلش انا لازم ابلغ في البني آدم ده هو اللي دمر حياة بنتك سنتين …والمرض الجلدي اللي جالها ده من الادويه الغلط ده مجرم لازم يتحبس
وانا خارجه وهي بتعيط بحرقه علشان ما بلغيش عنه..
ام كريمه:لا لا انا بنتي ملبوسه من الترب وفي شيخ..سامي عارفه بيجي كل شهر يفك اللي حصلها وان شاء الله هتخف قريب وتبقي زي الفل
حياة:يا ستي سامي ده اكيد هو اللي بيعمل كده لهدف في دماغه انا مش هسكت علي الجريمه دي..
ام كريمه:ده بيحبها اكتر من نفسه وبعدين هو لِسَّه كاتب كتابه عليها من خمس شهور لما لاقي موضوع علاجها طول قالي انه معها لآخر العمر ومش هيسيبها
حياة:انتي ازاي توافقي علي كده والمأذون ازي كتب الكتاب وهي بالحاله دي؟!!!
ام كريمه:ماهو المأذون مش غريب قريبنا برضوا وعمها كان وكيلها
حياة:لو سمحتي وقفي أي علاج
وخرجت وسيبتها ورحت القسم اعمل محضر في سامي والعلاج اللي بيطلعه من غيرروشته وبصفتي دكتوره كتبت تقرير عن خطورته والظابط كان شاب محترم اوي اسمه عبود وجه سامي شاب في الثلاثين من عمره مثقف وعارف هو بيعمل ايه
عبود:الدكتوره عامله محضر فيك لانك بتدي علاج من غير روشته والعلاج ده جدول وكمان دمرت حياه .. ثناءعبدالعزيز
سامي:الكلام ده كدب وثناء مراتي وانا ابن عمها وانا ماعرفيش الدكتوره جابت العلاج ده منين؟؟!!!
حياة:من عند ثناء اللي انا مش عارفه انت عملت فيها كده ليه
عبود:يعني العلاج ده مش انت اللي صرفته من غير روشته
سامي:لا يا فندم انا ماعرفيش عنه حاجه
خرج الظابط بعد ما دخل عسكري طلب منه ان المأمور عاوزه،وانا كنت مع سامي لوحدينا في المكتب قرب مني وابتسم ابتسامه خفيفه كلها خبث وبصلي بعينه من تحت نضاره نظر لابسها وهمس ليا
سامي:ثناء لما قررت تسيبني دفنتها حيه،ورميت عليها حاجه جابت لها صرع انتي بقي احسن لك تبعدي عننا لاحسن اخاليكي تشوفي ليله زي اللي عايشتها في التربه..
خفت جدا وماعرفيتش أرد دخل الظابط وبص حس ان في حاجه
عبود:في حاجه يا دكتوره
بص عليا سامي بابتسامه خبيثه ..هزت راسي للظابط ان مافيش حاجه
سامي:يافندم انا بشكر الدكتوره لاهتمامها بس هي ما تعرفيش ان ثناء بنت عمي ومراتي وقعت في تربه واتقفلت عليها يوم ب ليله وللأسف التربه طلعت بتاعت واحده ست ماتت محروقه لانها كانت بتعمل اعمال للناس وشغاله في الدجل والشعوذة وهي بتعمل سحرها اتحرقت حتي لاغايه دلوقتي لو عديت من اودام المقبره بتاعتها تسمع صوتها وخصوصا في أيام معينه،،والتربي هو اللي قال لنا الكلام ده
عبود:طب تفتكر الدكتوره بتتهمك ليه؟؟
سامي:مش عارف انا أصلا ما عرفهاش وهي اكيد هتسحب اتهامها ولا ايه
مش عارفه أرد ولا عارفه اتصرف كنت خايفه منه ومن شكله حاولت استجمع قوتي
حياة: بس انا مصممه علي بلاغي وانه فعلا بيصرف العلاج من غير روشته ودمر به خلايا مخ ثناء،،
عبود:طيب يا دكتوره انا بنفسي هعمل تحرياتي في الموضوع ده لو طلع حقيقي مش هرحمك ،
خرجت من عند الظابط وانا تايه ازاي واحد يعمل كده في انسانه بيحبها علشان رفضته يدمرها بالطريقه دي ويخاليها تعيش معاه غصب بعنها وعايشه شبه الأموات ،وهو وسط الناس شخص مثالي وطيب والمصيبه انه بجح بيعترف باللي عمله ليا عادي ويهددني كمان ،بس انا مش هسيبه غير لما أحبسه وأعالج ثناء،وهدور علي كريمه وليلي وباقي البنات؟!!!
