غادة حنفى
كنت في البلد بزور اهلي لاقيت حوا بنت عمي عندها عشر سنين كانت مش زي عادتها.. قاعده دايما ساكته لوحدها حاولت اتكلم معها
حياة:مالك يا حوا مش بتتكلمي ليه معايا زي عادتك ؟؟
حوا:اصل حصل معايا حاجه في الشهرين اللي كنت قاعده فيهم عند عمنا منصور
حياة:طب قوليلي حصل معاكي ايه ياقلبي
حوا:انا خايفه أتكلم
أخدتها في حضني علشان أطمنها وبدأت تحكي..
حوا:بصراحه كانوا بالنسبالى أسوء شهرين فى حياتى ..
كنت مع بابا بزور عمي منصور وفضلت اعيط لبابا وأقوله انا عايزه اقعد مع عيال عمي لاغايه ميعاد فرح اخويا وارجع معاهم..المهم بابا وافق
عدى اول اسبوع وانا فرحانه بالقاعده وسطهم بدأت مرات عمى تضايق مني
تعمل فيا ايه تشغلنى فى الغيط مع عيالها وانا بينى وبين نفسى غيط ايه ده هى مش واخده بالها انى لسه صغيره.. المهم اتكسفت أقولها لاء بقيت اروح الغيط انام هناك وارجع عامله نفسى هلكانه وهدومى كلها طين
تقولي:ايه يابت إللى مهببك كده ..
اقولها:معلش من الشغل. رد ابنها الغبي وقال هي بتتعب الصراحه من النوم تحت الشجره طول النهارعلشان تعاقبنى تخلينى انا اغسل هدومي.وانا بغسلها لاقيت كتكوت قولت اغسله بالمره…النضافه خدت حقها معايا راح الكتكوت فطس مات من غير ما اقصد والله..
وجت مرات عمى شافت الكتكوت جالها العصبي وجريت ورايا بالشبشب
تقولى وحياة امك ماهسيبك وراحت جابت لعيالها كلهم شكولاته وحلويات وانا لاء زعلت اوي الصراحه وبعتتني مشوار بعيد ولوحدى علشان اروح اشوف الخياطه فاتحه ولا لاء علشان هدوم الفرح..وانا ماشيه جنب المقابر وفى ضهر الجبل رشاح وطول ما انا ماشيه حاجات غريبه جدا وأصوات مخيفه لحد لما لمحت حد في الزرع بيقول ..حوا ..حوا…صوت زي مرات عمي بالظبط قربت من الصوت شوفت شيء مخيف جدا بيضحك،قولت اكيد هي طالعه بتخوفني اخدت الطريق جري لبيت عمي ودخلت الاوضه بسرعه ودخلت تحت البطانيه من الخوف وهي شافتني وجت ورايا
بتقولي:مالك يابت شوفتي عفريت
قولتلها:اه شوفتك
قالتلي:ماشي يا قليله الادب الصبح له عينين
وخرجت وانا بحاول انام من الخوف سمعت صوت رهيب ووقعت من على السرير
تاني يوم بحكي لعمي ردت مراته” قالتلى اللي شوفيتها دى سلعوه انا معرفيش شكل السلعوه فقولت اكيد السلعوه دي ؟!!!
فى تانى يوم وانا نايمه سمعت خبطه جامده جدا كأن حاجه انفجرت ،، اهل البلد كلهم صحيوا علي الصوت ناحية الرشاح دخان كتير طالع كله جرى رايحين يشوفوا فى ايه ؟! لقوا ان فى عربيه نقل العجل بتاعها فرقع ودخلت في الرمل والرمل غطى نص العربيه.. الناس كلها فضلت تحاول تبعد الرمل علشان تلحق الناس إللى جوه وبالفعل قدرو يشيلو الرمل وجابوا مقطوره تشدهم لكن الغريب مافيش أثر للسواق والمساعد بتاعه ومحدش عارف عنهم حاجه قرروا الأهالى يفتحوا صناديق العربيه ويشوفوا فيها ايه؟؟!!!
فتحوا الصندوق الاول جثث كتير مسروقه من المقابر وفتحوا الصندوق التانى لقيوا السواق والمساعد بتاعه.. ميتين ومرميين فى الصندوق وبعد تحريات من الشرطه معرفوش يحلو لغز السواق والمساعد اللي معاه؟؟!!
لكن عمي قال:ان حارس المقابر بيقتل اى حد يزعج الأموات
قولتله: قصدك الغفير
قالي:لا لاء حارس المقابر ده نوع من أنواع الجن المكلف بحراسه المقابر
قولتله:: انت عرفت ازاي
قالي:: انا واحد من الناس إللى شاف حارس المقابر
بيقول كنت فى يوم كنت بحضر دفنه لوالد واحد صحبى بعد نص الليل
قررت انى اروح ازور ابويا المتوفي لحد مايخلصوا وانا فى الطبيعى مابخافش أصلا وقَعَدت اودام التربه أفتكر ابويا واعيط بحرقه كأنه لسه ميت وفجأة ببص على الجنب التانى لقيت راجل جاى عليا بس مش قادر احدد ملامحه لكن عرفت انه راجل من صوته وجه لعندى وطبطب عليا وقالى بقالك سنتين كل لما تيجى تعيط بالليل وهو مابيردش عليك سيبه وامشى هو خلاص مش هيرجع تاني ، حطيت ايدى على كتفه مالقتش كتف حسيت ان ايدى جت فى مكان فاضي
حاولت ما اخافش ، هو مشى وانا بدأت اتوتر بس كملت قاعده ، فلقيت طفل صغير جاى عليا وماشى بطئ جدا من قلب المقابر .. بقول في سري هو الطفل ده تبع الجنازه بتاعت والد صاحبي وجي ينده عليا؟!! لكن كل لما الولد يقرب عليا يكبر قولت يارب الأرض تنشق وتبلعني قبل مايوصل ليا،سمعت صوت رهيب قومت ووقعت علي الأرض تاني،قومت وفضلت اجري حتي صاحبي شافني فضل ينده عليا مارديش عليه ماعرفش وصلت البيت ازاي،من ساعتها عرفت من عمي ان ده حارس المقابر ومش عاوز حد يجي بالليل يزور..
انا من ساعتها خايفه وبشوف السلعوه دي كل يوم في أحلامي بتنده عليا وخايفه اوي
ماعرفيتش ارد عليها لاني عارفه الحكايه دي من ابويا سواء صدقتها او ماصدقتهاش مش هتفرق لكن في فعلا حارس من الجن مكلف بحارسه المقابر؟!!!
