انتبه !! .. امامك مطب

بقلم : ياسمين سامي

حياتنا زي شوارعنا كلها مطبات، والمطبات اشكال وألوان فيه منها المربع- الحاد – الهرمي – المكسر- الملون – الشيك – المنور – الخفي …. الخ ده طبعا غير الحفر والنقر والبلاعات اللي بنعتبرهم (عادي) .. المهم انه على اختلاف الاشكال دي كلها إلا إن المطب هو المطب ، يإما هنعدي منه بسلام ، يإما (هنلبسه) ونتعرض لبعض الخساير ولكن برضه هنعدي منه.
خبرتنا في سواقة حياتنا هي اللي هتساعدنا على تجاوز المطبات والأزمات اللي بتعترض طريقنا .. وأهم حاجة بتساعدنا على التجاوز بأقل خساير هي تقديرنا لحجم الأزمة او المطب قدامنا .
فيه مطبات كبيرة بتكون واضحة على مسافة معقولة بتديلنا وقت ومساحة كافية اننا نستعد لمواجهتها .. وفي الحالة دي بنهدي علشان نعدي في سلام .. العند أو ان الواحد يكون غشيم وبرضه التسرع في مواجهة النوع ده من المطبات مش في مصلحتنا نهائي .. من الآخر ، المطب العالي عليك زي الموجة لازم تبقى هادي جدا لتجاوزه.
المطبات (النص نص) دي رغم انها المفروض متشافة لكن ساعات كتير مبناخدش بالنا منها .. الموضوع بسيط والمطب ده بيعتبر الاسهل في تجاوزه بس لو كنا مركزين .. لكن برضه لو متعاملناش معاه بتأني وحكمة برضه هنتأذي .

قبل ما انقل على النوع الثالث اللي اكيد انتوا متوقعينه .. فيه نوع من المطبات خطير جدا .. بعض الناس -وانا كنت منهم- بيستمتعوا بيه .. لكن للأسف بيكون ضرره خفي .. ممكن تأثيره السلبي ميبانش في وقتها ولكن على المدى البعيد بنكتشفه وبنكون نسينا ان السبب الرئيسي كان من المطب ده … ازاي حاجة اتبسطنا بيها تأذينا !!! .. كتير مبنتقبلش الفكرة دي ” السم في العسل” .. المطب ده هو مطب الهوا .. الوحيد اللي معظم الناس بيقابلوه بنفس سرعتهم .. مبيهدوش.. بيندفعوا وبيجروا عليه كأنهم بيرموا نفسهم في احضانه .. وهو ينزلهم ويطلعهم تاني وهما بيضحكوا وكأنهم في ملاهي .. والنتيجة .. بستر ربنا.

اخيرا .. المطبات الصغيرة .. الرفيعة الحادة .. اللي مهما هديت وانت بتعديها بتعاندك وبتخلي كيانك كله يترجرج .. مزعجة جدا المطبات دي .. علشان كده رغم صغرها وشكلها اللي يبدو بسيط بيتعملها ألف حساب .. خصوصا انها بتكون سلسلة متكررة ورا بعض .. يعني ليها توابع مبتبقاش مفردة زي الباقين.

المشاكل اللي بنواجهها في حياتنا بالظبط هي المطبات بأنواعها واشكالها المختلفة ، وبقدر تركيزنا وقوة الضوء اللي بنكشف بيه الطريق قدامنا بيكون تفادينا للمطبات دي وتجاوزها بدون اضرار أو للأسف بنخرج منها بخسائر متفاوتة .

زي ما بنستعد للمطب من بدري لازم نستعد لمواجهة اي ازمة او مشكلة.. بشكل عام المطبات والأزمات بيحتاجوا مننا الهدوء ، حتى لو عبورنا مكنش سلس واتعرضنا لخساير برضه هنحتاج للهدوء علشان نقدر نكمل حياتنا ومشوارنا بعد ما هنكون اتعلمنا وركزنا اكتر واكتسبنا خبرة اكبر هتساعدنا أكيد في اللي جاي .. لإن ببساطة مشاكلنا زي مطباتنا هتفضل تقابلنا طول ماحنا ماشيين وعايشيين.