حكايات وأسرار البنات والستات .. حكاية روز

غادة حنفى
في حاجات كتير بتحصل لنا بيحاول العقل يستوعبها لكن مع الأسف ساعات بتبقي اغرب من الخيال…
انا روز من اسكندريه ساكنه في محرم بك.اتخرجت من كليه التربيه واشتغلت مدرسه بحب ابن عمتي كرم والحمدالله ارتبطنا كنت عايشه اجمل أيام حياتي فتره الخطوبة مشكلتنا الوحيدة الشقه مش لاقين شقه دورنا كتير لدرجه اننا قررنا نتجوز عند عمتي كنت رافضه في الاول لكن في يوم لاقينا تليفون جه ل كرم من واحده ست بالليل بتقوله ان في شقه في أبو قير للإيجار ،لاقيت تليفون في نص الليل
روز:ايه يا كرم بتتصل دولوقتي ليه …خير
كرم:مش قادراستني للصبح فاكره الإعلان اللي نزلتيه علي النت كنتي بتسالي
فيه عن شقه
روز:ايوه ده من حوالي ثلاث شهور
كرم: تقريبا في واحده لِسَّه شايفاه لاقيتها بتكلمني دولوقتي وبتقولي في شقه في أبوقير للإيجار وبسعر خيال انا مش مصدق خمسائه جنيه في الشهر وعقد ستين سنه من غير مقدم تخيلي..
روز:معقول ده اكيد نصب؟!
كرم:تعالي بكره نروح نشوف انا وانتي يمكن حد أتعاطف معنا وقرر يساعدنا
روز:انا مش مصدقه نتقابل الصبح ونروح الشقه دي انا مش هنام لاغايه الصبح
فعلا انا وكرم اتقابلنا تاني يوم روحنا العنوان اللي الست قالت لكرم عليه بس الغريب كل ما كرم يتصل بالرقم اللي كلمه يلاقيه مقفول المهم قابلنا راجل هناك اسمه عّم سمير السمسار كبير في السن عنده عين مقفولة وعينه التانيه فيها بياض غريب كنت حاسه انه مش شايفنا أصلا.. لاقينا البيت قديم شويه بس ماسك نفسه شكله حلو من البيوت القديمه بتاعت زمان ..لكن مافيهوش سكان

السمسار:انتم اللي جاين عاوزين الشقه في البيت ده
كرم:ايوه انا في واحده كلمتني وقالتلي عليها
روز:بس لِيه البيت فاضي مافيهوش سكان
السمسار:هو كان في سكان ومشيوا وصاحب البيت قرر يأجره بدل قفلته دي
طبعا انا وكرم طلعنا لاقينا في الدور اللي احنا فيه باب شقه مش موجود أصلا والشقه اللي هناجرها حلوه اوي استغرابت جدا
روز:معلش انا عاوزه اعرف حاجه ليه صاحب البيت بيأجر شقه زي دي بالسعر ده في حاجه ؟!
السمسار:لو مش لأزماكم مافيش مشكله
كرم:لا احنا عاوزينها احنا بس مستغربين كرم اخلاقه وبعدين الشقه تقريبا مش ناقصها حاجه غير اننا نفرش العفش
روز:طب ممكن نقابل صاحب البيت
السمسار:هو مسافر وعاملي توكيل
روز:لكن..احنا عاوزين نشوفه
كرم:ماشي ماشي مافيش مشكله انت الخير والبركه برده هات العقد نمضيه
للأسف كرم ما ادانيش فرصه أتكلم او اعترض اتخانقت معاه
روز:انا حاسه ان الموضوع في حاجه غلط
كرم:انتي اللي طول الوقت شايفه ان في حاجه غلط مع ان الموضوع واضح راجل بيتقي الله شاف شباب عاوزه تتجوز ومش عارفه حب يساعدنا
روز:يا سلام..مع اني مش مقتنعه بس خاليك فاكر
كرم:ياستي في اسوء الظروف لو نصب احنا جوا الشقه ومعنا عقد وعلي المتضرر اللجوء الي القضاء..
فضل يضحك وفرحان انا بصراحه مع اني كنت خايفه بس برده فرحت ان أخيرا هتجوز ولاقيت شقه ،فرشنا الشقه واتجوزنا بسرعه ،بس الغريب البيت برده ما كانيش فيه غيرنا ..كرم عمل لكل دور لمبه علشان لما نتطلع وننزل انا كنت ساكنه في الدور الثالث مره راجعه من عند امي بالليل متأخر لانها كانت تعبانه كرم أفتكر اني هبات عندها بس انا قولت اروح لانها بقت احسن طالعه السلم لاقيت بنت جميله طالعه اودامي فرحت قولت أخيرا البيت بقي فيه سكان لاقيتها دخلت الشقه اللي من غير باب في الدور اللي انا ساكنه فيه قولت يمكن لِسَّه هيركبوا باب دخلت لاقيت كرم نايم كنت جعانه اوي دخلت المطبخ اعمل أي حاجه اقولها خرجت في الصاله لاقيت البنت اللي كانت طالعه اودامي ودخلت الشقه اللي جمبي قاعده في الصاله عندي بتبصلي وتبتسم.. طبعا قلبي كان هيقف لاني قفله باب الشقه كويس وصرخت خرج كرم يجري من الاوضه اختفت البنت فضل يطبطب عليا وبيحضني ويقولي مافيش حاجه لاغايه لما حكيت له خرج راح يشوف الشقه اللي بابها مفتوح لأقها فاضيه أقسمت له ان في بنت دخلت الشقه وكانت قاعده في الصاله بتضحكلي فضل يتريق عليا…
كرم:مش المفروض كنتي هتقعدي عند مامتك
روز:ما انا لاقيت امي بقت احسن قولت اروح أغير هدومي وابقي اروح لها بكره
المهم فضل يهدي فيا ويطمني..تاني يوم روحت عند امي أشوفها لاقيتها تعبانه قررت اني انام عندها وما اروحش تاني لوحدي بالليل ،فضلت عند امي اربع أيام لاغايه لما بقت كويسه الغريب ان كرم ما اتصليش بيا ولا مره انا بصراحه زعلت وماحاوليتيش اتصل به لأننا في الاول والآخر قرايب ازاي يعني مايتصليش يسال علي امي قررت ما إرجعيش البيت ولا أكلمه لاغايه لما يجي عندي ويصالحني بس ماما قالت انها هي اللي هتتصل بيه وتعاتبه

ام روز:انا زعلانه منك اوي يا كرم
كرم:ليه يا امي
ام روز:ينفع ما تسأليش عليا ابدا كده وانا عيانه
كرم:انا اسف بس روز قالتلي انك بقيتي احسن عموما انا هجيبها وأجيبلك
ام روز:تجيب مين وتيجي روز عندي هنا
كرم:عندك فين سلامتك يا امي روز معايا هنا
ام روز:يا حبيبي روز عندي هنا بقالها أربع أيام دي حتي زعلانه منك
كرم:لاحول ولاقوه الا بالله انتي تعبانه اوي كده يا امي انا جيلك حالا انا و روز
امي حكيت ليا اللي قاله كرم … قولتها ده بيستهبل علشان ما يصالحنيش
لكن جه وشافني واتفاجا واتوتر اوي
كرم:انتي ازاي جيتي هنا انا سيبك في البيت وقولتي مش عاوزه تخرجي
بصينا لبعض واستغربنا اللي بيقوله …وامي عرفته ان انا ما كنتيش في البيت أصلا راح باب يدور علي الحكايه لاقي ان البيت ده ليه قصه انه مسكون بواحده اسمها روز كانت يهوديه والبواب اللي كان شغال عندها قتلها وخبي جثتها علشان ياخد البيت منها وبالفعل خده لكن الراجل اتجنن بعد ما مراته ولعت في البيت وفي العيال راح اعترف علي اللي عمله لكن البوليس مالاقيش جثه روز،ومن ساعتها البيت ده بقي مسكون لكن السؤال فين السمسار اللي ظهر لنا وأجر لينا الشقه اشمعنا اختارتني انا وكرم لفينا كتير عند مشايخ لان كرم أعصابه تعبت وبقي يكلم نفسه كأن في واحده معاه..المهم كرم لِسَّه تعبان وبشوف روز و دايما بيقولي انها شبهي جدا..فعلا في حاجات بنشوفها العقل بيرفضها لكن هي فعلا حقيقه؟!!