بقلم ميرنا يونس
فى حاجة دايما بنسمعها من أجدادنا ومن الناس الكبيرة بس مش بنفهم يقصدوا أية بالتحديد ..
جمله اية دى يا ترى ؟!
لا تنظر ع اللبن المسكوب ولكن حافظ ع ما تبقي منه لديك؟!
واية دا كمان جايه تتثقفي علينا ..
لا خالص جاية اقول حاجة مهمه لأغلب البشر ..
لاغلب البشر اللي قفلوا عنيهم وعقلهم ودفنوا نفسهم بنفسهم وهما عايشين ..
ازاى؟!
بمنتهي البساطه ..
دايما انظر جهة الجزء الإيجابي مش السلبي ..
ع اللي اتبقي منك مش اللي فات من عمرك مع حاجة متستاهلش ..
هتقولي ياستي دا فلان أو فلانه أو الشيء دا يستحق اني ازعل عليه ..
هقولك حاجة ..
سواء كان شيء مادى أو معنوى اتعود دايما تذكر الله ..
يمكن مكنش دا خير ليك ..
او يمكن لو كان حصل زى ما دعيت أو اتمنيت كنت اتأذيت ..
احيانا بنزعل ع اللي راح ومبنحاولش نبص ع اللي فاضل مننا ولا بنحاول نبص لقدام ..
دايما بنبص لحاجة واحدة بس ..
وهي الماضي..
الماضي اللي لو عشت عليه باقي عمرك هتدفن نفسك بالحيا ..
اتعود تبص لقدام واوعي تبص ع اللي فات ..
بص للجزء المليان مش الفاضي ..
لانك لو بصيت ع اللي ناقص هتفضل طول عمرك بتدور ع حاجة معينه وبردو مش هتلاقيها ..
هتعيش تدور ع كل حاجة كامله حتي البشر ..
حتي البشر هتدور ع الجزء الإيجابي بس وهتهمل السلبي ..
اصحي يا ابن ادم دا مفيش حد كامل ..
فوق وابدء من جديد حتي لو هتبتدي من الصفر ..
احلم واسعي ورا حلمك وقول يارب ..
مع كل نهاية بداية جديدة
مع كل فصله جملة جديدة
ومع كل نقطه سطر جديد
ومع كل حلم نهاية سعيدة
